Press Release
July 23, 2017

Grace Poe's dzBB Interview Transcript
with Ms. Nimfa Ravelo

Nimfa Ravelo: Magandang umaga po, Sen. Grace Poe.

Sen. Grace Poe: Magandang umaga, Nimfa at sa lahat ng nakikinig.

Ravelo: Kahapon po na-raise ninyo yung sa human rights sa inyong pagtatanong, humarap po yung dating member ng Bangsamoro Transition Commission si Samira Gutoc-Tomawis at may mga sinabi siyang instances ng human rights violation sa Marawi, despite that ma'am bumoto pa rin kayo para sa martial law extension, bakit po?

Poe: Unang-una, hindi talaga maiiwasan, hindi naman talaga natin dapat gamitin ang martial law ng basta-basta pero kahit na anong sitwasyon, may martial law man o wala dito sa iba't ibang parte ng bansa, marami talagang human rights violation at tayo talaga ay nakikisimpatya dito nga kay Samira at nagpapasalamat sa kanyang pagsasalaysay nito sapagkat di dapat ito talikuran at pabayaan. Dapat bantayan ito ng ating gobyerno na huwag mangyari subalit binabalanse din natin, Nimfa, ang sitwasyon sa buong Marawi. Kung wala halimbawa ang presensya ng ating sundalo din doon ay marami rin sa ating mga kababayan ang nabibiktima mismo ng mga terorista. Makikita natin yung mga napupugutan ng ulo, iba't ibang mga klase ng pang-aapi sa mismong mga kababayan natin doon, so binabalanse natin. Ikaw na mismo ang nagsabi nga na mismong ang Commission on Human Rights ay nagbeberipika pa ng reports ng mga sumbong na ito. Minamadali din natin sila pero dapat maayos ang trabaho. Hindi naman natin ito ipinapagsawalang-bahala, kailangang parusahan kung sino man sa ating gobyerno, sa military man o sa pulis, sa mismong executive na nagkasala ng human rights violations, pero yun nga first things first, unahin natin ang mismong banta sa seguridad ng mas nakararami sa lugar na iyon.

Ravelo: Ma'am, sa security briefing sa Senate ay napakinggan ninyo po yung mga paliwanag. So ma'am, kumbinsido talaga kayo na kailangang kailangan ang martial law para po madurog yung Maute o ma-resolve yung sitwasyon sa Mindanao? Kasi ma'am mayroong argumento na kahit naman walang martial law kaya naman po ng ating AFP at PNP.

Poe: May mga bagay talaga na kailangan nila ang kapangyarihan na iyon. Pero gaya nga ng paulit-ulit kong sinabi, sana nga 60 araw lamang para nandoon tayo sa pagkakataon na mas ma-review nang maayos ang kanilang operasyon kaya lamang ang nakakalungkot nga nito, dahil sa teknikal na pamamaraan, ang aming dapat aksyunan ay ang liham ng pangulo na humihingi nga ng extension at nakalagay doon kung ilang araw. Kung hindi natalo yung mosyon na iyon, hindi pwedeng magkaroon ng isa pang mosyon, yung hinihiling ganito--hanggang Disyembre, noong naghain si Sen. Drilon na kung pwede ay hanggang 60 days, binoto ko iyon, kaya lamang iilan lang kami, 5 lang kami. Dito nga sa hanay ng mga independent, ako lamang yata ang bumoto doon na sana hanggang 60 days lang para mayroong period of evaluation. Sa tingin ko kung ilang barangay ang nasakop ng Maute noon, sabihin na natin 90, at ngayon ay 4 na lang ang natitira, sa 60 days, natalo nila (ang kalaban) sa ilang lugar, siguro naman hindi nila kailangan agad hanggang Disyembre, pero kung ang kwestyon naman ay hanggang Disyembre o walang martial law, panig na ako doon sa mayroon kasi kailangan din na medyo mabigat din ang pagtutok ng ating military. Unang-una, sa checkpoints, ito yung talagang malinaw na sinabi nila sa martial law, kapag may checkpoint at walang martial law, kailangan pa ng warrant para i-search ang mga sasakyan, o sa mga lugar halimbawa na mayroon pang pagdududa na may nagtatago doon, kailangan mo ng warrant para kumuha sa korte. Minsan alam naman natin kumakalat na ang balita, nauunahan na tayo, nakakawala na ang dapat nating hulihin. So sa mga bagay na iyon, oo, kailangan ang agarang mga desisyon at aksyon ng ating military, pero nga isa din sa sinabi ko doon ay dapat magkaroon ng reporting mechanism. Alam mo trabaho ng Kongreso ay oversight. Ibig sabihin tinitingnan natin kung tama ba ang performance ng ating gobyerno, so pwede naman namin talaga silang ipatawag para mag-report at kapag nakita namin, gaya nga ng sinabi ni Sen. Sotto, noong umpisa pa lamang, kapag mayroong paglabag o pang-aabuso, nasa kapangyarihan namin na bawiin or to nullify the extension of martial law, yun yung mga bagay na may safety measures naman na nakatalaga.

Ravelo: Paano po yung monitoring mechanism noon? Paano niyo po gagawin yung pagbabantay doon po sa mga pag-abuso?

Poe: Unang-una, pwedeng mag-usap kaming mga senador at siguro magsama na rin pati sa Lower House na humiling muna ng briefing on a regular basis, anong araw, sabihin na natin every 3 weeks o every 2 weeks. Hindi naman pwedeng basta ipatawag lahat ng namumuno sapagkat ang iba sa kanila ay nasa Marawi. Kailangan din praktikal, ano ang magiging maayos na pagmimeeting, halimbawa walang napag-usapan na regular na oras ng pagtitipon, maaari namang ang isang senador ay maghain ng resoluson na dapat ay magkaroon ng hearing dito, closed door man or open to the public, yung mga bagay na ganoon, hindi naman nawawala sa ating pagbabantay nitong operasyon nila sa Marawi. Ravelo: Ma'am, kayo po kapag nakita ninyo yun po, na stabilized na ang sitwasyon sa Mindanao at may mga pag-abuso man halimbawa ay magsusulong kayo na i-revoke itong martial law?

Poe: Syempre, unang-una kapag mayroong napatunayan talaga na pang-aabuso ng ating mga sundalo na sa ngayon ay bineberipika. Bigyan din naman natin ng kaunting pagpupugay ang ating mga sundalo na marami naman sa kanila, mayorya sa kanila ay matinong ginagawa ang trabaho nila. Siguro alam nila na nagbabantay ang mga kababayan natin, so pagbigyan natin sa puntong iyon. Huwag naman puro pag-aakusa rin na mag-aabuso, pero kapag mayroon naman akong nakita, siyempre pangalan ko rin naman ang nakataya diyan, nakapirma ako diyan, ang mga sinabi kong hindi ko papayagan ito. Ako mismo ang magsasalita. Hindi naman dapat ikasama ng loob ninuman, ng ating mga kasamahan o mismong ang ehekutibo sapagkat trabaho ko iyon. Ayokong mangyari iyon kahit sa aking pamilya kung saka-sakali, pero bakit nga ayaw natin na basta-basta gamitin ang martial law? Kasi ang martial law ay nagdadagdag ng kapangyarihan at nagbabawas ng pagkakataon na mabusisi ang proseso. In short, even transparency is not upheld as much in martial law kasi there are certain processes that are suspended. Alam din natin talaga that power corrupts absolutely. Kaya tama rin naman na medyo tayo ay nagdadalawang-isip, nagtatatlo at nagsasampung-isip bago tayo mag-martial law kasi kapag sobrang kapangyarihan, talagang magkakaroon ng pagkakataon ng pang-aabuso kaya kailangan talagang ma-obserbahang mabuti at mabantayan.

Ravelo: Ngayong extended ang martial law hanggang December 31, sabi niyo nga mayroong additional powers ang gobyerno para maresolba ang problema sa Mindanao, may mungkahi po ba kayo para masagad po nila o malubos yung paggamit ng panahong ito at ng dagdag nilang kapangyarihang ito?

Poe: Sa tingin ko dapat talaga i-intensify nila ang kanilang intelligence, kasi hindi pwedeng banat ka lang nang banat. Sa panahon ngayon parang nakukulangan tayo pati sila sa kanilang assets on the ground. Kaunting information ang nakukuha nila, ang hirap kasi Nimfa, ang gyera na ito ay hindi tradisyonal. Ang gyera ngayon ay iba na, marami nang guerilla type sapagkat hindi lamang sa isang lugar ang gyera, sa bahay-bahay. Kaya nga tayo nahihirapan kasi kung mayroon talagang teritoryo makikita natin kung tapos na. Hindi eh, nasa loob ng bahay. Sinasabi nga ni Sen. Sotto na 1,000 na masasamang loob, ang sinasabi natin ay ganito, yung kanilang report, 1,200 ang kabuuan, 66 ang naaresto, 400 ang napatay, 666 ang hindi pa accounted for, kung hindi ako nagkakamali. Maaaring nasa Marawi sila, maaaring nasa kalapit na lugar at sa iba't ibang parte nga doon sa Mindanao.

Ravelo: Baka daw po, dahil ang daling nakuha, ang daling naibigay sa pangulo yung hinihingi niyang extension, ngayon baka gusto niya po, ito ay gamitin na rin, samantalahin na rin ang pagkakataon, paabutin na rin ang martial law pati sa Luzon at Visayas, buong Pilipinas na. Do you share the same concern?

: Unang-una, kalokahan na isipin ngayon yan. Pero balikan natin, ano ba ang sitwasyon, bakit nagdeklara sa Marawi? Unang-una, ang Maute inokupa nila ang mismong mga gusali ng gobyerno. Ang mga barangay doon, kontrolado nila, hindi na kaya ng mga kapulisan doon. So nakikita ba natin na nangyayari yan dito sa ating lugar? Dito sa Luzon halimbawa o sa Visayas? Wala namang absolute control maski saang lugar ang mga rebelde. In cases of rebellion and invasion, yung dalawang bagay na iyon, kung nakikita nating nangyayari dito, hindi naman natin nakikita. So papaano makukuha ang pag-apruba rin ng Kongreso at Senado na talagang, siyempre, Nimfa, natuto na tayo sa martial law kahit noon pa, kaya nga yung Konstitusyon natin medyo malamya na ang bersyon ng martial law na ito at maaari rin nating bawiin maski na kailan, ng Kongreso at Senado, at pati na rin ang ating mga Korte ay patuloy pa rin ng pagtakbo.

Ravelo: Pero, ma'am yung apprehension or fear na mag-martial law din sa Luzon at Visayas, not necessarily yung Maute o Isis aabot dito kundi yun pong punto na ng dineclare yung martial law, sa Marawi lang naman yung problema at mga karatig probinsya, hindi naman sa buong Mindanao. Ngayon, tatargetin na rin ang NPA sinabi nga ng Presidente, eh may NPA sa Luzon at Visayas, so pwedeng kahit Bicol lamang ang gulo, sasabihin pwedeng umabot ang gulo sa buong Luzon so pwede na rin ideclare ang martial law?

Poe: Alam mo kahit anong araw maaaring magkaroon ng trahedya kung saan man, pero kailangan mong timbangin ang kabuuang seguridad ng ating mga kababayan, sa mga lugar na binabanggit nila na maaaring magkaroon ng martial law, talagang may banta. Pag may bantang ganun, kailangan pa rin yang busisiin sa Senado. At sinasabi ko na ngayon, dadaan yan sa butas ng karayom bago yan maipasa at sa tingin ko sa ngayon, napakalayo sa ating isipan, kaya nga we are trying to contain the situation in Mindanao and mabuti na rin na nakikita natin ang proseso, papaano. Ang ating military, ano ang kakulangan sa kanilang operasyon. Papaano yung ating intelihensya, kailangan nating ayusin yan sa buong Pilipinas hindi lamang sa Mindanao para hindi nga magkaroon ng bantang ganyan. Bago pa lang malaman, bago pa lang mangyari, masupil na. Kaya nga sinasabi natin, kahapon nag-uusap kaming kapwa senador na hindi kaya alam ng mga, alam mo marami din sa kanila, parang tayo rin, magkakamag-anak din diyan, magkakaibigan, hindi ba nalaman beforehand na magkakaroon ng ganyang klaseng gulo doon. Sinasabi nga na ang Human Security Act talagang, yung national security advisers ng Pangulo, dapat mag-convene. Kailangan kung mag-usap-usap hindi lamang iyong mga sa Cabinet, kailangan pati miyembro ng oposisyon, miyembro ng iba't ibang mga hanay, para makalap natin ang intelihensya na kailangan natin para malaman kung ano talaga ang nangyayari sa iba't ibang parte ng ating bansa.

Ravelo: Ayan ma'am kaya ko po naitanong ng minority, o kaya iyong mga senador na kasapi ng minority bloc kahapon, hindi po ba ang nag-raise niyang fear o pangamba na baka pati sa Luzon at Visayas ay mag-martial law. Kasi kung halimbawa magkaroon dito ng isolated na gulo, sa ilang lugar, ay gayon na nga, idamay na ang buong Luzon, Visayas kasi parang itinuturing na isolated lang sa Marawi at karatig lalawigan at bayan iyong gulo pero idinamay na ang buong Mindanao sa martial law?

Poe: Ako talaga, hindi ako papayag na basta-basta nilang gagawin iyan. Sinasabi ko ang aking sariling paninindigan at pananaw sapagkat ilang dekada rin nating pinangalagaan ang ating kalayaan dito sa bansa. Hindi tayo papayag na sa gobyerno man o sa mga terorista, sila ang aagaw sa kalayaan na iyan, parehong pagbabantay. Ang ginagawa naman ng minorya na pagbabantay at pagbababala ay tama, sa tingin ko lahat tayo dapat ay magduda, lahat tayo dapat magbantay. Ako ay hindi miyembro ng minority o kahit na anong partido, independent naman ako pero ang masasabi ko, Pilipino tayong lahat. Ito iyong bansa na dapat magkaroon ng patas na kalayaan para sa lahat. At alam ko na kapag merong martial rule ay hindi talaga magiging patas ang pagpapatakbo ng ating gobyerno.

Ravelo: Ito extended na, so paano ninyo sa Senate ito babantayan? Magkakaroon ba po kayo ng specific na, meron po ba kayong parang ganon, specific na plano para i-suggest na magkaroon ng so and so, number of weeks. Binanggit ninyo kanina pero magkakaroon ba kayo ng specific request para po magkaroon ng specific number of days or weeks na magpatawag kayo ng hearing?

Poe: Oo, pwede kaming mag-usap usap tungkol nga dito, informally muna, pero titingnan natin kung kailangang maghain ng resolusyon para tawagin din ang Senado na mag-usap usap kung papaano natin gagawin, uusisain at ano ang gagawin nating batayan para masigurong maayos ang pagpapatakbo ng mga operasyon sa Mindanao, pero hindi ko pwedeng sabihin ngayon mismo na dapat mag-mimeeting sa military o kung every month ano

Ravelo: A month after po...

Poe: Kailangan siyempre, consensus iyan ng aking mga kasamahan, bagama't may kapangyarihan ang bawat senador na maghain ng resolusyon upang tanungin at magkaroon ng pagpupulong kung papaano natin tatalakayin ito.

Ravelo: Kasi ma'am hindi ba po para hindi iyong naghihintay na lamang ng reklamo, hindi ba ma'am?

Poe: Well oo, kaya nga sinabi ko rin diyan na dapat magkaroon ng reporting mechanism at isa nga iyan sa nais kong i-klaro sa liderato ng Senado at kung kinakailangan ay maghain ng resolusyon para magkaroon ng mas malinaw na proseso dito.? On emergency powers

Ravelo: Ayan ma'am, baling po ako doon sa ibang isyu. Kayo po nabanggit po ninyo ito kanina, sa aking introduction, kayo po ang chairman ng Public Services Committee at ng Public Information Committee. Sa Public Services Committee muna ma'am, noong SONA ni Pangulong Duterte, unang SONA niya, ang sinabi niya gusto niya ng emergency powers para po maresolba iyong krisis sa traffic. Kayo po ang nagpatawag ng mga public hearing tungkol diyan. Nag-endorse na rin po kayo ng committee report tungkol diyan, nasaan na po ang panukala, at iyon ho ba ay patuloy pang isusulong?

Poe: Alam ninyo, iyon na nga rin iyong kalituhan dito, kasi noong umpisa, ganadong ganado nga sa emergency powers dahil hindi biro talaga iyong dinaranas nating traffic araw-araw. At naniniwala ako, kahit na sabihin mo naging katunggali ko ang pangulo, na para sa kabutihan ng mas nakararami na masolusyunan kaagad itong problema sa traffic. Hindi ba, iyong mga mismong kasamahan sa Senado, tinatanong ako, 'Grace nasaan na iyong emergency powers?' Sabi ko 'nag-hihearing na ako, pero siyempre hindi naman natin pwedeng basta bara-bara' tapos noong period of interpellation na, parang medyo nawalan na ng gana iyong iba dahil nga, ito kahit naman ikaw minsan mapapansin mo patas lang naman ang ating obserbasyon, mismo namang sa ehekutibo, hindi masyadong dinidiin hindi ba? Tinanong ko nga mismo iyong Pangulo, 'Mr. President do you need the emergency powers?' Ang sagot naman niya sa akin, 'mapagkakatiwalaan mo si Sec. Tugade' pero hindi iyong eksaktong kasama doon sa mga priority measures ng unang SONA niya. Pangalawa, dito sa darating na priority bills ng Pangulo, hindi ko alam kung kasama (ang emergency powers). Sana kasama kasi ma-eencourage din, magkakaroon ng motivation ang ating mga kasama na ipasa na kasi siyempre, alam mo naman sa Senado, hangga't hindi ready magtanong ang isang senador, hindi mo naman maisusulong, so hindi mo basta pwedeng sabihin na hindi ka na pwedeng magtanong. Kapag nagpalista iyan, magtatanong iyan, kailangan mo namang bigyan ng palugit.

Ravelo: So ma'am in short po, nagawa ninyo na iyong parte ninyo nandiyan na yung committee report, nailatag niyo na, kung nagtatagal yan hindi kayo ang may kasalanan?

Poe: Hindi ko sinasabing, alam mo hindi mo pwedeng sabihing kasalan ko, kasalanan niya. Ito ay isang inisyatibo ng Senado 'di ba. Kung makakatulong ito, pag may isang batas na hindi naipasa at makakabuti sa ating bayan, yan ay pagkukulang namin, lahat kami magkasama dito, kaya nga ginagawa ko, siguro gagamitin ko na ang aking charm factor para mapasa na ito (laughs). Kasi alam mo Nimfa, ito ang problema, pag wala niyan, halimbawa may mga kwestyong ligal na alam mo namang kalokohan minsan, frivolous lang yung mga kaso, mag-file ng kaso sa isang mababang korte e biglang TRO na yan, hindi na matutuloy yang proyekto na yan. Pangalawa, kapag mayroong mga right of way issue, pag may isinampang kaso, yan ang tagal-tagal, samantalang dito sa bersyon natin, pag may mga kasong ganyan, kunwari ito ay aking lupa pero kailangang gamitin ng gobyerno para magkaroon ng malawak na kalsada, pwede kang bayaran ng gobyerno ng fair market value. Ibig sabihin hindi lang zonal value. Kung hindi, kung magkano ba talaga ang bentahan sa mataas na merkado ng iyong property at yan ay kaagad-agad babayaran ng gobyerno. Tapos yung mga informal settlers di ba, pag 'yan ay pinalikas mo, pinaalis mo sa lugar, kailangan bigyan mo nang maayos na tirahan, saan mo kukunin ang pera para dyan? Ang emergency powers natin ay magbibigay ng pondo para nga sa relokasyon ng ating mga kababayan na maapektuhan nito kasi hindi pwedeng magpaalis ka lang na wala namang alternatibong lugar para sa kanila. 'Yun ang nangyayari ngayon, kaya minsan ang nagiging problema, sa bilis ng imposisyon ng mga proyekto, unang una yung relokasyon, pangalawa, yung right of way issue, 'yun yung dalawang bagay na tinututukan dito. At pangatlo, yung iba't ibang mga regulasyon sa bawat siyudad. Halimbawa, nasa Mandaluyong ka, iba rin ang batas trapiko sa Makati, iba rin ang alituntunin dito, kailangan mayroon talaga ng isang central traffic authority na pumapaligid sa lahat. Kasi yung MMDA hindi naman nila pwedeng i-supersede yung kapangyarihan ng local government kapag hindi mga main road.

Ravelo: Opo, Ma'am pati yung sa bidding di ba makakapagpabilis sana or they can do away with biddings.

Poe: Pwede yun, pwede talaga yun pagdating sa mga special procurement method, emergency procurement methods, pwede yun. Pero siyempre maayos din ang ating batas sa pagsasabi, halimbawa meron kang emergency procurement, negotiated contracts or kung anuman para sa MRT, ang kukunin mo lang kumpanya halimbawa ay isang European company, sapagkat dun lang ginagawa yung parte na yun, ngayon papayagan natin, o dahil yun ang may reputasyon. Ang nagiging problema, kahit na palpak ang supplier, pero dahil yun ang pinakamura

Ravelo: Yun ang kinukuha.

Poe: Kaya tuloy sira nang sira. Tapos ito pa mga kaibigan, mga kamag-anak ang nananalo ng kontrata na yan. Ngayon may sinasabi na kapag may emergency powers, baka ganon din ang mangyari, kaya nga magkakaroon din ng oversight committee ukol dito. Hindi suspendido ang mga batas natin pagdating sa graft and corruption kapag ikaw ay napatunayan na gumamit ng iyong kapangyarihan sa emergency powers sa maling paraan. Pero ang importante dito ay mabilis nating mapapatupad ang mga proyekto, iyong ating mga bridges, iyong ating train system, subway, mga kalsada dapat mabilis na iyon sana matapos na agad.

Ravelo: Kaya iyon ma'am ito po ay tama ho ba nasa second reading, period of interpellation pala ano ma'am?

Poe: Oo.

Ravelo: Pero uusad lamang po ito ng mas mabilis kung sabi ninyo nga po may mga nagsabi na magtatanong ay magtanong na nga lang naman. So mapapabilis ito kung halimbawa ay ano ma'am? May hudyat sa Malacanang kung interisado pa sila dito o hindi? Ganoon ba?

Poe: Maraming kaalyado ang Pangulo hindi ba? So medyo sabihan, na ipasa na natin. Sa tingin ko makikinig sila. Ako naman, hinihikayat rin naman natin ang mga senador na magtanong kung mayroon silang pagdududa, trabaho nila iyan. Pero, unahin din siguro ang measure na ito sapagkat balewala ang emergency powers kung matatapos na ang termino ng pangulo.

Ravelo: Oo, tama. At saka ma'am mukhang kailangan ito ng presidente kasi sa dami po ng mga infrastructure projects na gusto nilang gawin under the 'Build, Build, Build' program na gagawin daw po sa susunod na taon.

Poe: Oo. Kaya nga, Nimfa, salamat sa pagbanggit. P8 trillion nga ba?

Ravelo: Opo, ma'am. P8 trillion.

Poe: Makatotohan ba talaga iyan? Ang sabi ko nga, papaano ninyo iyan mai-implementa nang mabilis kung kulang naman. Mayroon nga kayong 'build, build, bulid' program ay puro naman balakid ng kaso, balakid ng right of way issue, balakid ng local government concerns, pag hindi naman ninyo naresolba iyan, hindi iyan matutuloy. Kaya nga ang ginagawa natin sa abot ng ating makakaya, sa ating poder, iyong ating kontribusyon dito, pero konting tulong din doon sa iba na para naman ito ay umusad na.

Ravelo: Paano ho ito, ine-expect ninyo ho ba ang abiso from Malakanyang kung sila ay interesado pa rito kasi kung hindi, bakit pa po ninyo ipu-push 'di ba?

Poe: Hindi. Ako, whether they are interested or not, whether they agree with it or not, there are certain laws that you feel are your obligation to push. Halimbawa, mayroon kang paniniwala na dapat ay libre ang pananghalian sa lahat ng pampublikong paaralan, kahit na sabihin mo na hindi sang-ayon ang iba diyan, kung naniniwala ka na makakabuti ito ay dapat isulong iyon. So, ako, mayroon mang hudyat sa kanila na ituloy ito o hindi, gagawin ko at kung hindi makapasa, edi hindi nakapasa, basta ginawa ko ang aking makakaya sa pagtulong at hindi tayo titigil sa mga inisyatibong ganyan. Kasi kung hindi ay di balewala naman na--

Ravelo: Kasi ma'am, sa Malakanyang nag-originate ma'am iyan di' ba? Sila ang humiling ng emergency powers tapos si Presidente ang nagbanggit nito noong SONA niya last year. Tapos ma'am, sa inyo po umusad, sa House pending pa rin yata sa committee?

Poe: Hindi, pareho na kami ngayon.

Ravelo: Second reading na?

Poe: Pareho na kami ngayon, pero iba-iba ang bersyon namin so kailangan talagang pag-usapan dahil iyong sa amin, kasama iyong air transport pati sea.

Ravelo: I see. Opo.

Poe: Ang sa kanila, land lang. Sige, sometimes may compromise, for the higher good 'di ba? So, kung ang kaya lamang natin ngayong ipasa ay iyong land, so be it. Basta mayroon na tayong one step forward. Ito naman ay puwede namang pag-usapan din ng dalawang kapulungan.

Ravelo: So, hihintayin po natin ang development. Ma'am, isa na lang, sa freedom of information bill ma'am na inyong napaaaprubahan po ninyo ito sa Senado noong nakaaraang Kongreso. Pero, ito pending na naman dahil hindi naisabatas, ano po ang status nito?

Poe: Period of interpellation ngayon pa rin. Siguro, hindi naging prayoridad dahil sa mayroon na raw sa ehekutibo ngayon

Ravelo: May executive order po.

Poe: Pero alam naman natin na walang parusang kaakibat iyong bersyon nila, siyempre walang motivation ang ating mga kawani ng gobyerno na sundin iyan kasi ano ba ang parusa doon, wala naman? So isinama ko iyan sa aking requested priority measures. Tingnan natin kung ito ay masasama o hindi, pero talaga, Nimfa, itong lahat ng ginagawa natin ay ang pinakaimportante ay ang mga isyung malapit sa tiyan ng ating mga kababayan. Hanggang ngayon, at binanggit ko rin ito sa ating pangulo, sabi ko sana na maipasa na ang pagkakaroon ng pagkain sa ating mga public elementary schools. Pati na rin iyong first 1,000 days o iyong unang isang libong araw ng buhay ng isang bata mula sa sinapupunan hanggang 2 years old. Bakit mahalaga iyon? Kasi kung maayos ang pagkain ng nanay habang nagbubuntis at habang ang bata, bago mag-two years old ay nabibigyan ng tamang pagkain, gatas at nutrisyon ay siguradong mas malaki ang pagkakataon na lalaking matalino iyan, at kapag matalino ang ating populasyon, sa dami ba naman natin ay talagang matatalo natin ang iba't ibang mga bansa.

Ravelo: Ano naman po ang tugon ng president noong ni-request ninyo na i-prioritize iyan?

Poe: Sabi niya, oo raw. Pero, alam mo naman...Alam mo si pangulo kung gusto niyang maging charming, charming siya. Kung ayaw niya, ayaw niya.

Ravelo: Totoo ho.

Poe: Gayundin sa panahon na iyon, masaya siya, sana naman at hindi niya makalimutan. Pero, alam mo naman, dito sa mundo natin hangga't wala diyan ay hindi mo masasabing sigurado na, 'di ba? So, wala pa naman ako naririnig na bali-balita na 'O, Grace mukhang prayoridad ito.' Wala pa naman. So, tuloy-tuloy pa rin ang dasal at sana ay mabigyang tinig ito.

Ravelo: Oho. Ma'am, isa na lang one year na po ni Pangulong Duterte, that could have been your one year, may moment ba ma'am na you could have done this or that differently or buti na lang hindi sa inyo ang problema?

Poe: Naku, alam mo mahirap ngayon na mga sinasabi nila, pero, unang-una, hindi mo naman malalaman kung ano ba talaga ang magagawa mo unless nandoon ka na sitwasyon na iyon. Subalit ikaw ay tao lamang at paminsan-minsan, lahat ng magaganda mong intensiyon ay siyempre pangarap mo na matupad ito. Marami tayong mga naging platform of government na sana ay inuna ng gobyerno, pero iba naman ang kanya, kaya marahil siya ang pinili ng tao dahil marahil iyan ang plataporma na mas ginusto nila. Pero, hindi naman iyon pumipigil sa akin para gawin iyong sa tingin ko ay nararapat nating direksyon sa aking munting paraan sa Senado.

Ravelo: On this note maraming salamat po.

Poe: Okay, maraming salamat din sa iyo Nimfa at sa mga nakikinig.

News Latest News Feed