Press Release
August 29, 2018

Transcript of Sen. Grace Poe's Interview
dzMM Dos por Dos with Gerry Baja and Anthony Taberna

Anthony Taberna: Magandang gabi po, Senator.

Sen. Grace Poe: Magandang gabi, Gerry at Anthony.

Taberna: Bago po ang lahat, puwede ba namin kayong batiin ng advance happy birthday?

Poe: Puwede naman, huwag lang ninyong sabihin ang edad ko.

Taberna: Happy birthday po, Madame Senator, at sana po ay lalo kayong yumabong sa inyo pong pagganap ng tungkulin bilang Senador.

Poe: Salamat po.

Gerry Baja: Senator, kami naman ang magtatanong. Kanina ay puro kayo ang tanong nang tanong, ano ho ang naging konklusyon o nakita sa hearing ninyo sa nangyari sa Xiamen Air?

Poe: Alam mo narinig ko ang introduksyon ninyo na may nagtatanong diyan, kami ba ay nag-ga-grandstanding lang o talagang gusto nating malaman kung ano ba ang nangyari? Kung hindi naman natin ito didinggin, hindi naman natin maririnig ang paliwanag nila at hindi rin naman maghaharap-harap lahat 'yan kasi kanya-kanyang presscon. Ngayon, ako ay hindi naman nagmamagaling kaya nga tinatanong natin kung ano ba talaga ang nararapat. Ito ang nalalaman natin: alam natin na tumagal ng 36 oras bago nila na-clear 'yan. Ang nangyari noong nagkaroon nga ng insidente ng mga alas-onse noong sumadsad ang eroplano, dumating do'n 'yung GM siguro mga bago mag-ala-una, hindi pa sila tumawag ng magtatanggal ng eroplano na 'yon, hanggang alas-nuwebe pa ng umaga nila nagawa 'yon. Hindi dumating 'yung magtatanggal hanggang siguro mga alas-dos. Tinanong natin kung ano ba ang proseso ninyo kapag ganyan? 'Di ba mayroon dapat kayong crisis management meeting? Mayroon naman daw pero doon sa crisis management meeting nila, hindi naman nila inobliga ang mga miyembro ng iba't ibang airline na mag-attend. Sabi ko, hindi dapat boluntaryo 'yan, dapat 'yan ay obligasyon. Kapag mayroon kayong crisis management, dapat nakasaad kung sino ang dapat nando'n. Tama naman din 'yung sinabi na sa ibang bansa ay inaabot din naman ng dalawang araw bago tanggalin 'yon, nandoon po tayo, pero ang pagkukulang ng marami-hindi lamang ng airport management, kundi pati na rin ng airlines-ay kung paano ninyo inasikaso ang inyong mga pasahero habang nangyayari ang lahat ng 'yan.

Baja: Tama kayo do'n.

Poe: Lahat ng atensiyon ng MIAA leadership ay nakatutok doon sa pagtanggal ng eroplano. 'Yung koordinasyon ng mga cancelled flights? 'Yung abiso? Alam mo bago nila naabisuhan na sarado 'yung airport, parang tatlong oras na ang nakalipas tapos papalit-palit. So kung ikaw ay galing sa Amerika, halimbawa 'yung abiso sa'yo ay tuloy pa rin, aalis ka na talaga kaysa ma-divert na naman ang flight mo. Hindi sa namamahiya o nagmamalaki, ito ang punto do'n: dapat matuto tayo dito kaya nga ito ay isa sa kauna-unahang pagkakataon na nangyari 'yan na ganito na talaga ka-busy ang airport natin.

Ang mga solusyon diyan ay ganito: unang-una, ako personally, hindi ko sinasabi na dapat mayroon kayong boom crane na nakaparada diyan. Ang sinasabi ko lang, dapat may listahan kayo ng mga lehitimong contractors na puwede ninyong tawagan kapag may nangyaring ganyan, kasi napakamahal namang mag-invest sa gano'n; pangalawa, ano ba ang crisis management team ninyo? Sino-sino ang bumubuo niyan? Bakit hindi obligado ang mga airlines na mag-attend; pangatlo, kailangan 'pag nakita na ninyo na hindi ninyo kakayaning tanggalin, mag-abiso na kayo na i-cancel ang mga flights para hindi naman naghihintay ang mga kababayan natin; pang-apat, ito ang pinaka-importante, humanitarian, magkano ba ang kinikita ng mga airlines 'di ba? Ano ba naman ang magpadala kayo ng pagkain-sagana sa pagkain at tubig-para sa mga naghihintay do'n. Hindi naman siguro ninyo ikahihirap 'yan. At 'yung airport, alam ba ninyo, ang dami nilang nakalap na mga hindi nagamit na mga terminal fee-halos P200 million na hindi pa nila naisasauli sa mga pasahero, kumikita pa 'yan ng interes-kung 'yun naman kaya ang gamitin ninyo para makatulong man lang kayo kapag nagkakaroon ng flight delay?

Ang dami pong bagay na dapat isaayos, maraming nagsasabi, 'tawagin na ninyo, pagresign-in na ninyo 'yan.' Siguro naman sa pagkakataong ito, bigyan natin sila ng pagkakataon na itama 'yan, magsumite sila ng kanilang mga suhestiyon at kung ano mang mga aksyon ang gagawin nila bago tayo manghusga.

Pero ang malinaw dito, sa committee report, ilalagay ko talaga na may pagkukulang. Unang-una, si Secretary Tugade, sabi niya he was on top of the situation but he wasn't even present in the airport until one day after, and his excuse was because he did not want to interfere with the operation, but I think it was more of a leadership issue. Senator Nancy was right to question him about his actual physical presence.

Baja: Wala ho siya do'n, hindi siya nagpakita, 'yun ang hinahanap ninyo sa kanya.

Poe: 'Yun ang sabi ni Senator Nancy na tinanong sa kanya. Isang araw lang naman daw, I can understand siguro sinasabi nga niya na ayaw niyang makagulo pero hindi po... baka naman ang leadership presence niya do'n ay nakatulong sana. Pwede nating masabi na he was on top of the situation but the incident proved otherwise.

Taberna: Sa isang banda po, kung kayo ba ang DOTr Secretary pupunta kayo do'n sa mismong lugar na 'yan o baka naman kanya-kanya ng management style?

Poe: Naroon na nga rin ako, kanya-kanyang management style. Alam mo mahirap din 'di ba, siyempre makikita mo ngayon, so sasabihin mo, 'ganito ang gagawin ko.' Ito na lang ang masasabi ko: mas okay nang sabihin na pumunta ang DOTr Secretary at mismong ang mga opisyal ang nakiramay do'n sa mga pasahero. Ano ba naman 'yung umikot, 'o kumusta na kayo diyan?' 'Magpadala kayo dito ng mga ganyan,' magandang makita 'yon. Hindi ko puwedeng sabihin na 'kung ako 'yon ito ang ginawa ko sana,' hindi, sa natutunan natin ngayon, mukhang dapat gano'n ang gawin.

Taberna: Alam niyo po ang isang kaklase ko noong high school ay isa po sa mga natengga diyan sa airport noong unang araw pa lang pero alam niyo, tuwang-tuwa siya sa paraan ng pag-aasikaso sa kanya ng airline company niya kasi papunta sila ng Europe.

Poe: Ano ang airline company niya?

Taberna: Hinahanap ko lang po ang Facebook post niya kanina pa, hindi ko lang mahagilap pero ang sabi niya puwede pa siyang ma-extend ng gano'ng situwasyon at ma-delay kung gano'n kaganda ang pagaasikaso ng airline niya.

Baja: Masuwerte siya.

Taberna: Depende talaga do'n sa airline company, kung ang airline company mo ay may malasakit, even without the prodding of the government officials.

Baja: At saka kahit na hindi nila kasalanan, 'yun kasi Senator ang naging katuwiran ng ibang airline companies, na wala namang problema sa kanila kundi nasa iba kaya hindi na inasikaso 'yung kanilang mga pasahero.

Poe: Totoo naman, pero 'di ba minsan ang hinahanap lang naman natin ay may kaunting simpatiya. Katulad nga ng nangyari do'n sa Singapore Airlines, sabi ng mga pasahero, bawat oras daw may update at nag-uumpisa sila sa paumanhin at binibigyan sila ng sapat na pagkain. Ngayon, hindi naman natin siguro kaya lahat ng ibinibigay ng ibang mayaman na mga airline pero sa tingin ko naman kung may kaunting lambing man lang sa pasahero ay malaking bagay.

Taberna: Sila po pala, ito pong tinutukoy ko na kaklase, siya daw po at ang kanyang pamilya ay pinatuloy sa Century Park Hotel sa Manila at pagkatapos ay lahat daw po ng kanilang pangangailangan ay laging tinatanong ng airline company, ang airline company po nila ay Saudia Airlines.

Poe: Maganda namang marinig na may mga gano'ng airlines. Sa tingin ko naman ang Philippine Airlines at Cebu Pacific may mga pagkakataon din na nagbigay sila ng pagkain pero alam mo mayroong mga ibang reports rin-kung magiging patas rin naman tayo-na nagsasabing siguro na-overwhelm na rin yung ibang representatives nila na umalis na rin do'n sa puwesto.

Pati sa Immigration, alam mo kailangang patatakan mo ang passport mo na hindi ka natuloy umalis, sa ibang mga pasahero natin, tingnan po ninyo kasi kung lumabas na kayo ng airport na hindi nangyari 'yan, baka maging problema po 'yan later on sa inyong record. Ang mga bagay po na gano'n ay dapat klaro po, ito po ay learning experience na hindi dapat padalos-dalos ding manghusga, pero mayroon talagang pagkakamali at marami sa ating mga kababayan ang naperwisyo. Maikli lang ang bakasyon, nais namang humabol do'n sa mga mahal sa buhay, 'yung mga naghahanap ng trabaho-na itong simpleng paglipat ng gate hindi nila alam, hindi sila nakaabot at naiwanan pa sila ng flight nila. Pasensiya na po sa ating mga kababayan, marahil ang iba ay nabubugnot na rin na makinig sa mga hearing, kami man po do'n ay nakaupo ng ilang oras pero kasama po 'yan sa ating mandato. Kung hindi naman po natin gagawin, saan pa po natin maririnig na silang lahat ay magsasabong-sabong para magsabi kung ano ba talaga ang nangyari sa mga panahon na 'yon?

Taberna: At ang mainam 'yung makita kung ano talaga ang pagkukulang at tanggapin ang pagkukulang at ituwid ang pagkakamali na hindi na mauulit.

Baja: Senator, salamat at magandang gabi po sa inyo.

Poe: Maraming salamat po.

News Latest News Feed