GRACE POE INTERVIEW TRANSCRIPT
dwIZ Usapang Senado with Cely Bueno

Cely Bueno: Ma'am kumusta po at Happy Mother's Day! Sen. Grace Poe: Same to you, Ms. Cely. Happy Mother's Day sa lahat ng mga nanay na nakikinig din sa atin.

Bueno: Ma'am, kumustahin ko po dahil pare-pareho tayo na magda-dalawang buwan na naka-enhanced community quarantine. So, sa panahon ho na tayo ay naka-quarantine, ano po'ng pinagtuunan ng pansin ni Senator Poe?

Poe: Alam mo, siyempre hindi madali ang parang nakakulong ka; pero kung iisipin mo 'pag nasa bahay ka siyempre umiiwas ka na mapeligro sa mga ibang makakasalubong mo. Tapos dahil na rin sa naging pace ng buhay natin, tuloy-tuloy para sa akin ang trabaho noon; parang masaya rin naman ako na nakakapiling ko ang aking pamilya lalung-lalo na 'yung mga anak kong teenager na wala silang choice, hindi sila makalabas. So, mas nakakausap ko sila, nakakasama ko. Pero, siyempre, sensitibo rin naman tayo doon sa mga iba na ang hirap din na nasa bahay lamang dahil, siyempre, walang pinagkakakitaan. Kaya nga 'yung ating mga iniisip na dapat gawin sa mga susunod na araw ay papaano natin matutulungan 'yung mga kababayan natin na walang kinikita araw-araw at saka kung magbubukas man tayo ng ating, gagawin ng general community quarantine, ay mas magiging ligtas naman tayo hangga't maaari.

Bueno: Meron lang hong nag-message dito, kasi nasa Pasig City kami Ma'am; mukhang nakita nila na itong inyong anak na si Brian ay napaka-active pala kahit na may krisis. Namigay daw ho sa office ng lokal na pamahalaan ng Pasig, kina Mayor Vico Sotto ng bigas at saka mga testing kits. So, mukhang tuwang-tuwa ho ang mga taga-Pasig.

Poe: Taga-Pasig ka pala. Malapit lang pala kayo sa amin.

Bueno: Itong istasyon, nandito kami sa Pasig.

Poe: Oo nga pala, nanggaling na ako diyan sa inyo. Akala ko Mandaluyong kayo, Pasig pa pala. Actually, salamat sa pagbanggit. Oo, masaya naman ang pagkikita ng aking anak kasama si Mayor. Alam mo, idol din niya si Mayor Vico dahil nga napaka-progresibo ng kanyang pamamalakad. Pero hindi lang naman kami sa Pasig rin namigay, nandiyan din 'yung Maynila, 'yung San Juan, Quezon City, Pasay, halos buong lugar dito sa NCR. Pero hindi lang NCR, pati Luzon, Visayas at Mindanao kasi lahat naman tayo, Ms. Cely, kahit na may namimigay daw ng pera, hindi naman nakakatanggap pa lahat kaya dapat kung anong makakaya natin. Alam mo, hindi ko lang naman ito ginagawa mag-isa, malaking tulong dito ang nanay ko, 'yun ang totoo, ng aming pamilya at ng mga ibang kaibigan rin. Kaya napag-iipon-ipon namin kung anuman ang nakakalap namin at saka naipapamahagi 'yon.

Bueno: So marami po na sa inyo ay nagbigay at parang idinaan po sa inyo para maipamahagi po sa mga nangangailangan nating kababayan?

Poe: Oo, merong galing sa office namin, kung anuman ang pwede naming ibigay for donation. Kasi alam mo naman sa Senado 'di ba, very specific din na ito 'yung mga puwedeng ibigay. Ngayon, 'yung mga natipid namin siyempre naipamigay pero malaking tulong diyan 'yung nanay ko, dahil yung FPJ, 'yung talagang foundation ng Papa, alam mo naman si FPJ noon pa. So siya talaga ang nagbibigay ng malaki at meron din tayong mga kaibigan, mga supporters, may mga pribadong negosyo, na nakita nila na nag-uumpisa na kami ng tulong, nagpadala na nang nagpadala. Kaya maraming salamat na lang kasi, sabi ko nga, 'pag iniiisip natin, mag-uumpisa na tayong magbigay ng, kunwari, 50 sako muna ng bigas tapos may makakakita na nagbigay ng 50 o kaya 'yung nanay ko mababalitaan, 'Nagpunta ka pala sa ganyan dagdagan pa natin, o ito.' Kaya 'yun nga ang sinasabi nila sa Bibliya, 'di ba, huwag tayong matakot na konti lang tinapay natin, konti lang isda natin, pagka pinagsama-sama natin 'yan, makakaraos din naman sana tayo.

Bueno: So 'yun ang maganda ho sa mga Filipino, Ma'am, kumbaga 'yung bayanihan. 'Yung spirit ng bayanihan, 'pag nasa panahon ng krisis o kalamidad ay talagang marami 'yung tumutulong lalo pa't, kahit may Special Amelioration Program, marami pa rin tayo nakakausap na mahihirap nating kababayan na mukhang hindi naman daw sila naisali; hindi sila nakatanggap. So marami pong mga affected na hindi rin po talaga nakatanggap ng ayuda mula sa pamahalaan.

Poe: Oo nga, kahit gustuhin ng pamahalaan, hindi kaya. Kasi ang dami nating mga nangangailangan na hindi nakakapagtrabaho kaya alam mo mabuti na lang, 'yun nga 'yung nabanggit mo, 'yung bayanihan spirit. Kasi 'nung umpisa na medyo gumagapang pa ang gobyerno, hindi pa naipapamahagi 'yung dapat, ang pumuno 'nun ay private sector 'di ba. So, 'yung pribadong mga mamamayan natin ang talagang tumulong. Ito ang ginagawa, kasi 'di ba siyempre kapag nagsulat ka ng batas ay maganda naman, siyempre 'yun ang trabaho mo, pero bilang Pilipino hinahanap pa rin natin ang pakikiramay ng kahit ng mambabatas. Pero, 'O sige sumulat ka na ng batas pero ano nga ba 'yung naitulong mo?' Iba kasi 'yung kapag nagbigay ka ng tulong na direkta. So, 'yung anak ko ang in charge doon, siya naman ang nagiikot-ikot...Pero hindi naman 'yan ano kasi noon pa 'yan, buhay pa ang aking ama, 'yan na talaga ang ginagawa namin kapag may kalamidad at talagang kung ano 'yung maitutulong namin, tinutulong namin.

Bueno: Pero sa tindi po ng krisis na ating ikinaharap ay siguro kahit pa kanino galing 'yang tulong basta makatulong; dahil ang dami po talagang sobrang naging kawawa ang sitwasyon dahil po sa krisis na ito. Anyway, Ma'am 'nung bumalik ang session on Monday, kayo po ang unang nag-schedule na magsagawa ng committee hearing. Ang tanong papaano po ninyo gagawin, considering na ngayon po talagang, kagaya po ninyo, ang session ninyo ay via video or teleconference dahil nga hindi na uubra na laging magkakasama dahil hindi pa safe. So, papaano po gagawin ng Committee on Public Services 'yung inyong committe hearing sa Monday?

Poe: Gagawin natin katulad ng ginagawa ng session natin ngayon sa Senado. Si Senate President parang hybrid 'yung ginawa niya; so kung sino ang puwedeng pumunta sa Session Hall ay makakapunta pero 'yung mga panauhin natin ay video conference na lahat. Ako, kasi sinasabi 'nung Senate Secretariat, mas maigi kung present ako doon, physically. So, nandoon ako sa Senado pero 'yung ating mga inimbita lahat sila lalabas lang doon sa video teleconferencing. Ngayon, para sa kaalaman ng ating mga kababayan 'yung mga gustong makinig ng hearing, doon sa Senate website i-cocover 'yan kaya nga pinapapasok nila ako dahil mayroong technicality doon para ma-cover. Tapos ila-live ko rin doon sa Sen. Grace Poe Facebook page para doon naman sa iba na sa Facebook sila tumitingin. Kasi maraming apektado dito Ms. Cely, 'yung ating hearing kasi sa Monday ay tungkol sa sektor ng transportasyon. Ngayon, bakit ko inaakalang ito ay napakahalaga ngayon; kung kunwari sabihin ng Pangulo, 'O sige ililift natin partially ang quarantine ano, puwede nang magtrabaho ulit sa ibang kumpanya;' Bago natin payagan 'yung pagbibiyahe, ano ang magiging polisiya halimbawa pagdating sa mga jeep, pagdating sa mga tricycle, pagdating sa mga train. Gaano kalalayo ang dapat pagitan ng bawat pasahero, 'yung mask na suot-suot, tapos doon sa mga drayber ng jeep halimbawa 'pag sinabi ng gobyerno na hindi ninyo puwedeng punuin ang jeep ninyo, kalahati lang para social distancing, ano ang plano ng gobyerno na ayuda dahil siyempre 'yung boundary nila.

Bueno: Liliit ang kita.

Poe: Oo 'yung boundary nila hindi nila matutugunan 'yun. So, puwede bang may polisiya ang gobyerno na dadagdagan ng tulong, patuloy ang tulong sa kanila. 'Yun bang operators papayag ba na babaan ang boundary at kaya ba. So 'yun 'yung mga ano, tapos kunwari galing sa ibang bansa pupunta sa Pilipinas, magbibiyahe, papayagan natin itong mga eroplano na ito; papaano ninyo ite-trace 'yung mga bumabalik dito. Kasi alam naman nating naging palpak ang Department of Health last February, 'yung contract tracing. Tapos alam mo sa Hong Kong ngayon, kapag parating ka or aalis ka, meron silang parang booth na dinidisinfect lahat ng, 'yung damit mo. Gusto kong tanungin 'yung mga airport managers, ano ang safety nila in place. Tapos nag-imbita rin ako ng contractors na puwede kunwari may design, gaano niyo kabilis magagawa 'yan kung papayagan natin. Alam mo, lahat tayo kasi maapektuhan tayo ng transportasyon. Wala ka ngang sakit pero pag nagbiyahe ka naman, may sakit 'yung katabi mo, magkakasakit ka kung hindi ka nag-iingat. So, bago natin talakayin kung bubuksan natin, ano muna ang ginagwa natin para ligtas tayong lahat. Kaya gusto kong marinig mismo sa DOTr, sa LTFRB, sa GM ng airport, at 'yung iba't ibang bus transport, 'yung mga, anong tawag dito, 'yung Grab, 'yung Angkas, ano ang dapat gawin.

Bueno: So, Ma'am may mga lugar na sumailalim na sa general community quarantine, doon po ba ay nagsimula na mag-operate ang mga public, o umarangkada na, ang mga public transport. So ngayon po ba ay may malinaw na guidelines papaano po ang kanilang operasyon?

Poe: Alam mo Ms. Cely, 'yung totoo 'nun, may guidelines naman na inilabas ang DOTr...'Yun nga kailangan nating kunin na report ng DOTr. Kumusta ba ang mga GCQ areas, 'yung mga medyo hindi na masyadong restricted. Anong ginagawa nila kasi kasama 'yan sa report na dapat makuha natin...Kaya dapat talaga Ms. Cely ganito 'yan e, public campaign ito, kaya salamat din at binibigyan mo ako ng pagkakataon, ang dapat gawin ng DOTr, sa mga television, sa mga radio, gawing simple ang eksplinasyon. Halimbawa lahat ng magbibiyahe ngayon dapat naka-mask na sinasabi naman nila. 'Pag kayo ay pumipila sa MRT dapat isang metro ang layo, 'yung mga simpleng ganun na palagi dapat 'yan ipinapakita at hindi nakakalimutan.

Bueno: Oo kailangan talaga ay magkaroon ng malawakang information and dissemination doon sa mga dapat na gagawin lalo na po sa panahong ito na ang hirap, wala pa kasing gamot o lunas dito sa Covid-19 so kapag nagbalik na itong mga public transport, isa 'yan sa mga nakakatakot ho na sumakay sa public transportation, hindi mo alam kung sino ang carrier nitong virus.

Poe: 'Yun na nga kaya nga importante nga naka-mask kasi hindi mo alam 'yung hangin ding nilalanghap mo sa isang enclosed area, sa sasakyan 'di ba 'yun 'yung tatalakayin natin.

Bueno: So, Ma'am doon sa inyong committee hearing doon malalaman specifically kung ano 'yung nakikita na safe na, halimbawa, sa taxi ilan lang ang isasakay at kung papayagan pa ba ang Grab Share then paano 'yung sa LRT, MRT; paano ba 'yun dapat ba, meron pa ring physical distancing so paano 'yun, lahat po 'yun ang detalye na tatalakayin sa hearing on Monday?

Poe: Oo kasi 'di ba, baka 'yung social distancing para walang malito, baka lagyan ng ekis, ekis kung saan ka puwede na tumayo; o kaya bilog bilugan. Tapos ito pa, gusto kong malaman sa LTFRB, lahat ng papayagan na mamasada na mga drivers ng iba't ibang public utility vehicles ay dapat meron, kung kunyari buses 'yan, 'yung bus operators dapat mag-provide sila ng rapid test kits, para ma-test ang mga drivers. Kasi dapat bago sila pumasok doon, paano natin malalaman kung ligtas ba sila o hindi at i-contact trace din, malaman sa history kung meron sa pamilya nila o doon sa kanilang lokal na komunidad kung merong ano doon, nahawa. Kasi contact tracing na 'yan doon sa mga driver. Imagine mo kung 'yung driver mo mismo o 'yung konduktor hindi alam na siya pala ay positibo.

Bueno: So Ma'am ang isa yatang pinoproblema, let's say taxi operator, bus operator magkakaroon sila ng additional expenses at liliit pa ang kanilang kita. Ito po ba ay dapat na bigyan sila ng ayuda ng government para doon sa, sabi niyo nga dapat i-test, may testing kits sila para sa mga sasakay sa bus tapos 'yung iba naman kailangang may ilagay pa daw ho sa mga taxi, parang in between ng taxi driver at 'yung pasahero, parang may plastic.

Poe: Plexiglass, oo, tama, noon may ganun e. Ngayon nalang wala 'yan ano.

Bueno: Ano ba ito, dapat i-shoulder ng operator itong gasutusin, baka naman daw ito ay ipasa sa pasahe, ano po 'yung pananaw niyo dito Ma'am?

Poe: Well, ganito lang, lahat talaga tayo ngayon ay nakakaranas ng kakaibang pandemya, so sinong gagastos niyan. Natural, 'pag 'yung sasakyan sayo, ikaw ang gumastos niyan dahil ang mga driver parang empleyado mo 'yan. Ngayon, ito ba'y makakadagdag sa ibabayad ng mga pasahero, 'yun ang gusto nating malaman sa hearing. Siyempre ayaw natin na tumaas ang pamasahe. Pero dahil nga sa reyalidad na nangyayari, kung hindi na kaya gawin ng gobyerno na bigyan ng ayuda ang mga namamasada at kunyari nalugi 'yung mga may-ari ng kumpanya dahil, kunyari, mas konti ang biyahe nila o mas konti ang pasahero nila, magsasara 'yan 'di ba. So, ano ang dapat nating gawin para lahat naman tayo ay may pagkakataon na mabigyan ng lunas ang problema natin. Bilang pasahero, na huwag sanang tumaas ang pamasahe; bilang taxi driver, sana patuloy pa ang trabaho o kaya jeepney driver o anong public utility; o kaya bilang may-ari ng isang public utility, papaano ka naman hindi malulugi pero ibibigay mo pa rin ang mga minimum na kailangan for safety.

Bueno: Buti na lang mababa ngayon ang gasolina Ma'am pero hanggang kelan kaya ito?

Poe: ...'Pagka merong krisis nga na ganito, na bibihirang pagbibiyahe ng mga tao...hindi sumasakay ng eroplano, mababa ang demand sa krudo. At 'pag mababa ang demand, sobra sobra ang supply...

Bueno: So Ma'am kapag may ibang senador na gustong mag-participate sa hearing niyo on Monday, puwede rin sila via teleconference o video conference o kinakailangang sumama mismo sa inyo doon sa Senate?

Poe: Well, kung namimiss na nila na pumasok puwede silang sumama sa akin doon, pero 'di naman required. Basta may isang moderator lang na present sa Senate. Maraming senators ang nag-express ng intention to attend, kaya, I think mga 12 na ang nag-sign up, so exciting 'yan dahil talagang maraming mga tanong at sabi nga nila parang nakakatakot malaman kung ano 'yung, baka hindi pa handa. Kaya, sabi nga ni Senator Marcos, 'I'm afraid.'...'Nung nag-hearing kami noon sa Department of Health, tinatanong namin doon sa kalihim, 'Ano na-contact trace na ba ninyo?'...nakakadalawang linggo na dito 'yung flight, hindi pa nila nasasabihan, naabisuhan 'yung ibang mga pasahero. Kaya nga 'pag nagkaka-hearing na ganyan, doon mo talaga makikita kung

Bueno: Nagagawa nila ang trabaho.

Poe: Kung nagagawa nila pero minsan nagsisinungaling rin sila. Kaya nakakatakot rin minsan ang hearing kasi kung ano pa ang marinig mo doon, mas lalo ka pang madidismasya pero wala, kailangan nating gawin kasi we have to face reality and we have to make remedial measures ahead of time. Otherwise, a lot more people will be infected.

Bueno: Ma'am pahabol ko na dahil as chairman ng Committee on Public Services, although ngayon mukhang namang baka gumalaw na sa Kamara 'yung franchise renewal ng ABS-CBN dahil nagsalita na kahapon si Speaker Cayetano, oras po ba 'yon na ma-approve na sa House, mai-transmit sa Senate, may target ka ba na one week tatapusin niyo 'yung hearing at dadalhin ito sa plenary?

Poe:...Okay ganito 'yan, sinabi ko nga ako'y umaasa na sana nga ay gawan na nila, well kaya naman nila kung gusto nila, 'di ba. Nakita naman natin marami silang napapasang batas na mabilisan...Alam ko si Cong. Rufus (Rodriguez) may na-file na hanggang 2022 lang para lamang mabigyan ng sapat na pagkakataon ang Kongreso na pagdebatihan ito para malaman kung talaga bang karapat dapat nai-renew ng 25 na taon pa ang prangkisa ng ABS-CBN. Ngayon, ito ba ay mamadaliin pagdating sa Senado? Number one, nag-inhibit na ako bilang chairman ng hearing na 'yon.

Bueno: Oo nga pala.

Poe: Dinesignate ko si Senator Gatchalian to take over the Senate hearing kung magkakaroon tungkol dito sa ABS-CBN. Ang masasabi ko lang patas si Senator Gatchalian, masipag at pinag-aaralan kung anuman ang na-aassign sa kanya. At pangalawa, ang ating mga kasamahan sa Senado, marami na sa kanila ang pumirma, expressing support for the provisional authority to operate for ABS-CBN. So, wala naman akong nakikitang malaking balakid kung saka-sakali, maaari lamang sigurong tingnan kung ano ang bersyon na iaakyat ng Kongreso. Sana nga ay magkasundo na kami sa parehong bersyon kaagad para hindi na kailangang magkaroon ng mahabang Bicam.

Bueno: Oo at nang sa gayon maiakyat na po sa Office of the President. So Ma'am, so ang mag-sponsor nito sa plenary, just in case, si Sen. Sherwin Gatchalian?

Poe: Siya oo, siya ang mag-sponsor nito. Ayun, so at least medyo makakapahinga ako, pero siyempre actively akong mag-oobserve but officially I will not vote at saka hindi rin ako magtatanong na sa hearing.

Bueno: Let us just hope na pagdating sa Office of the President ay hindi po ito i-veto ng Pangulo.

Poe: Siyempre siya lang ang nakakaalam niyan pero umaasa naman tayo dahil sinabi nga niya na mahalaga naman sa kanya ang kabuhayan ng ating mga kababayan 'di ba, 'yung trabaho. Siyempre, ngayon pa na, alam mo 'yung Department of Labor and Employment, 'dun sa mga benefits na, 'yung pwede mong makuha sa kanila, 'yung cash benefits ng mga nawalan ng trabaho, sinabi nila naubusan na sila ng pondo sa ngayon.

Bueno: So wala ng ipamimigay?

Poe: Walang cash, parang depleted 'yung funds, kailangan mag-infuse ulit. Can you imagine ngayon, ilan ang mawawalan dito sa ABS, so dudulog lahat yan sa DOLE. Paano natin matutulungan sa ngayon. Hindi lang 'yan 'yung impormasyon, katulad ng istasyon niyo, 'di kayo nahirapang kumuha ng prangkisa sa akin dahil napatunayan ninyo ang serbisyo, dahil sa inyo naririnig ng ating mga kababayan ang balita. Ikaw, isa sa pinakamasipag na journalist sa Senado, 'di ba araw-araw nandoon ka, hindi ka naman nag-aabsent. So, in short, makikita mo naman, oo siyempre negosyo 'to, kumikita pero may kapalit naman na dapat gawin, hindi ba. So, kahit doon sa malalayong lugar naririnig kayo. Napapanood ang ABS-CBN, papaano doon sa mga lugar na mawawala ang ABS-CBN, walang signal doon, hindi sila makakapanood. Bagama't meron namang GMA 7, pero alam natin sa buong Pilipinas, kunyari sa Metro Manila ka, malakas ang signal ng GMA 7, sabihin na natin; o kung ikaw naman ay nasa Mindanao, ewan ko kung sa Mindanao ba malakas ang ABS. May mga ganun e. May mga parte na

Bueno: May mga lugar.

Poe: Oo kaya sana nga mas marami pang media companies ang maging matagumpay dito. 'Yung TV 5 nga maraming umasa sana na magiging talagang malakas na network din kasi 'pag maraming networks ang ganyan, mas maraming trabaho, mas maraming malilipatan ang ating mga kababayan para makapili sila ng trabaho na angkop sa kanila.

Bueno: At maraming mapagkukunan ng impormasyon ang ating kababayan Ma'am.

Poe: Correct dahil kapag sinabi natin na tingnan mo 'tong network na 'to napaka-biased, ayoko na diyan, lipat ako sa kabila; papaano kung iilan ilan na lang 'di ba?

Bueno: Ma'am nakikinig ang aking boss na si Edgard Cabangon, nagpapasalamat uli siya dahil nga doon sa franchise ng aming istasyon, ang aming FM at nakikinig rin si Ms. Sharon Tan. So magandang hapon daw po sa inyo.

Poe: Hello Mr. Cabangon and Ms. Tan.

Bueno: So Ma'am maraming salamat, sana maulit muli ang aking pakikipanayam, pakikipagkwentuhan sa inyo. So, bukas dahil naka-quarantine, you have more time na i-celebrate ang Mother's Day with your family.

Poe: Oo tapos siyempre hindi ko rin nakikita ang nanay ko 'di ba, hanggang telepono lang kami pero mabuti na lang madami siyang napapanood na telenovela ngayon kung hindi maiinip 'yun.

Bueno: Ma'am pinapanood ko pa man din 'yung Santino na nandoon 'yung nanay ninyo, biglang nagsara ang ABS-CBN.

Poe: Nakakalungkot ito 'no, ganun e 'di ba, parang sa ngayon pa na mas, hindi lang impormasyon, 'yung mapapag-aaliwan natin na libre 'di ba.

Bueno: Yes, opo.

Poe: 'Di bale Ms. Cely, gumawa ka na diyan ng, meron ba kayo sa TV o wala. Meron kayong franchise with TV rin 'di ba.

Bueno: Connected kami, ang amin sa CNN Philippines, tapos kami naka-live sa streaming sa Facebook.

Poe: O 'yan, gawa na kayo ng content, gumawa kayo ng drama. May maaabangan ang ating mga kababayan na mga talent.

Bueno: Hindi Ma'am, parang wrong timing talaga dahil 'di ba merong may depression talaga 'yung tao dahil hindi makalabas ng bahay, meron tayong kalaban na hindi nakikita. Tapos nung nawala pa 'yung pinaglilibangan nadagdagan pa 'yung depression. Ako naramdaman ko 'yun e kaya sabi ko ano ang nangyari.

Poe: Oo nga. Alam mo, ang hindi naintindihan ng iba, sabi nila, 'O bakit parang dinidiin nito masyado ng mga senador na ipaglaban ito?' Alam mo gagawin namin 'yan kahit GMA 7, kahit TV 5. Kaya nga 'nung dumaan sa akin ang GMA 7 at 'yung TV 5 ang bilis bilis, wala naman kaming pinapahirapan lalung lalo na kapag napatunayan nila 'yung track record nila kasi para sa akin pagka, kunyari, nangyari 'yan sa isang kumpanya, siyempre ayaw mo na magkaroon tayo ng reputayon na basta-basta na lang ililigpit ang isang malaking kumpanya, na mawawalan ng trabaho. So, magiging insecure ngayon ang mga gustong mamuhunan sa ating bansa at mas lalong insecure 'yung mga tao that anytime, wala na silang pagkukunan ng pangangailangan nila.

Bueno: Ma'am 'yun bang frequency nila, it doesn't mean na puwede nang ibenta ngayon dahil expired na 'yung ano, hindi naman po ganun ang mangyayari?

Poe: Well, hindi, alam mo, 'yun nga 'pag nag-expire ang franchise mo, unless meron kang, pinayagan kang mag-operate, technically puwede nilang sabihin na, 'Nag-expire na 'di ba, pwedeng ibenta 'yung franchise nila, frequency.' Pero hindi naman namin papayagan 'yon kasi 'di ba sa amin dumadaan 'yan, hangga't alam namin na dinidinig pa itong sa ABS; so remember, pwede namang sabihin na, 'Hindi, ibenta na 'yang frequency na 'yan.' Pero ang magbibigay pa rin ng franchise, Congress at saka Senate. So kung hindi pa rin kami pumayag, o 'di naka tengga diyan, kasi kung magkakaroon ng protest, kunyari, 'Ay hindi, hindi pwedeng ibenta 'yung frequency na 'yan.' 'Yung mga gustong i-extend 'yung provisional authority ng ABS-CBN dahil nga dini-deliberate pa. Kung ayaw nilang pirmahan 'yung bagong ia-award na frequency, 'di hindi rin 'yon makaka-broadcast.

Bueno: So hindi ganun kabilis para maibenta sa iba 'yung frequency nila?

Poe: Actually ang frequency, hindi naman ang House or Senate ang nagbibigay 'nun, 'yung sa amin 'yung franchise, pero may frequency ka nga na galing sa gobyerno, wala ka namang franchise, so wala, parang ano 'yan, bato lang sa bulsa mo.

Bueno: Ma'am tinitingan niyo din ba ito na parang pag-atake sa press freedom o hindi naman po, itong nangyari sa ABS?

Poe: Siyempre hindi mo masasabing literally attack sa press freedom kasi kayo naman malaya pa rin kayong nakakapagpahayag. Pero nakita naman natin na if you silence one media outlet or a journalist kahit papaano nararamdaman 'yan ng mga ibang katrabaho mo. Gamitin na natin 'tong example na ito; kunyari may isang artista na nagtatrabaho sa isang kumpanya, tapos okay naman siyang magtrabaho, ganyan, ayaw lang siya ng boss niya, 'di ba, pinaalis siya, 'O hindi na kita isasama dito kasi.' Ayaw lang siya, napagtripan. Siyempre 'yung ibang artista, 'Naku kailangan magpakatino tayo.' 'Di bale sana magpakatino, as in, in a good sense, puwede rin na maging duwag na, 'di ba, hindi na lang kikibo kahit na, let's say ang working conditions nila masama. Kasi ganun, pag may nagreklamo kunyari na isang empleyado tapos 'yung nagreklamong empleyado na 'yon ay pinatalsik, kahit na hindi ka naman direktang apektado, matatakot ka.

Bueno: Ma'am curious lang ako, si Ma'am Susan, ang inyong nanay, ano pong naging reaksyon, nagalit po ba sa nangyari dahil alam naman natin na isa siya sa mga talent ng ABS?

Poe: Ganito 'yung nangyari, sabi niya malungkot siya, kasi alam naman natin, Ms. Cely, sa edad niyang ito, bonus na nakakapagtrabaho pa siya, ginagawa niya ito dahil masaya siya.

Bueno: Passion.

Poe: Masaya siya sa trabaho niya. Oo, 'yun 'yung kanyang expression of herself. Masuwerte nga siya pagka, sinasabi nga niya, siya'y nagpapasalamat sapagkat, simple lang naman siyang mamuhay, hindi na niya kailangang magtrabaho, nakapag-ipon na siya, kahit papaano. Ang iniisip rin niya 'yung mga nakakasama niya doon, nakakadaupang-palad na mga regular na empleyado. Marami sa kanila mga bata pa, bago pa 'yung pamilya, na papaano nila, o kaya medyo matanda na pero hindi pa nakakapag-ipon, papaano sila na 'pag lumipat sila sa isang kumpanya, siyempre 'yung kanilang seniority status hindi 'yun guaranteed, 'di ba. O kung kunyari 'pag 40 years old ka na, tapos lilipat ka, mag-uumpisa ka sa umpisa 'di ba.

Bueno: So 'yun ang inaalala niya.

Poe: 'Yun ang inaalala niya sa kanila kasi marami doon may mga benefits, let's say health benefits o mga retirement. Siyempre natatakot 'yung mga 'yon. 'Yun 'yung sinasabi ng nanay ko sa akin. Salamat na lang hindi pa naman ganun kainit ang ulo niya.

Bueno: Oo, 'di ba, ano 'yan, palaban si Ma'am, 'di ba.

Poe: Super. Kaya nga sabi ko, sabi ko doon sa mga kasama niya sa bahay, lagyan niyo ng yelo 'yung ulo pagka umiinit na

Bueno: Ang init pa naman ng panahon, Ma'am.

Poe: Kayo, uminom kayo ng maraming tubig, 'yung heat index ngayon napakataas kaya maraming, maraming mas lalong nagkakaheart-attack ngayon ha, kaya mag-ingat po tayong lahat.

Bueno: Ma'am Salamat, kumusta rin daw po mula kay Ma'am Letty, mommy po ni Ma'am Sharon Tan.

Poe: Hello, hi Ma'am Letty, Happy Mother's day po sa inyo, advance.

Bueno: Ma'am, thank you po, inabala ko po kayo ngayong weekend

Poe: Okay, enjoy your Sunday. Bye.

Bueno: Salamat po. Bye.