Press Release
August 30, 2016

GRACE POE'S BALITANGHALI INTERVIEW TRANSCRIPT
with Ms. Connie Sison

Sen. Grace Poe: Magandang tanghali Connie at sa lahat ng nakikinig, magandang tanghali din po.

Connie Sison: Ano po ang inaasahan natin sana na ma-isumite sana ng Department of Transportation at nasuspinde po ngayon itong pagdinig?

Poe: Noong huling hearing natin, humingi sila ng palugit na mga dalawang linggo. Ngayon, pareho tayo, sawang-sawa na rin tayo sa traffic, marami na talagang galit at ako naman at gusto natin talagang tulungan ang administrasyon na ito na magkaroon na ng solusyon para dito. Sa agarang panahon. Kaya lang, hindi naman natin ma-ibibigay yung kapangyarihan na emergency powers hangga't hindi natin alam kung ano ang magiging saklaw nito. Ano ba ang kanilang mga proyekto? Resonable naman yung hiningi nilang oras, sa ngayon ang gagawin natin para hindi naman masayang din ang oras, ay bumubuo kami ng mga sectoral, technical meetings kasama ang iba't-ibang mga grupo--halimbawa: sabihn natin itong araw na ito, mga bus. Sa susunod na araw naman, yung mga cyclists. Sa susunod naman yung mga sa jeep. Kasi at least yung maliliit na technical meetings, mas mapagtutuunan ng pansin ang mga partikular na pangangailangan ng bawat sektor. At yan naman ang makukuha naming impormasyon--kung ano yung kanilang mga suggested solutions o kaya yung mga wishlist nila o sa tingin nila yung mga malalaking problema, pwede naming pagsama-samahin iyan at ibigay rin sa DOTr para yun naman ay maiincorporate sa kanilang mga plano. Kaya at least dito, nakatutok, mas maliit ang grupo, mas mayroong tayong maibibigay na solusyon.

Sison: Ano po ang hiniling ninyo sa kanila particularly for the next hearing? Ano ang kailangan nilang mai-provide po sa inyo na mga dokumento, plano, o solusyon?

Poe: Alam mo, kami naman talaga ay resonable rin eh. Gusto namin silang bigyan ng mas malaking pagkakataon na kahit hindi naman lahat ng detalye, basta ano ba ang malalaking plano ninyo? Kunyari, sabihin nila, magdadagdag kami ng tulay sa lugar na ito, maglalagay kami ng isa pang linya ng MRT or LRT, sa Cebu naman ito ang gagawin natin, bus rapid transit, kung ano man ang plano nila para alam natin kung ano ang magiging saklaw dapat ng emergency powers.

Sison: So the last time po, I remember you already mentioned that to them. In other words, sa ngayon, wala pa rin po itong mga nakalatag na ito?

Poe: Wala pa. In the last hearing hindi nila nabanggit kung ano yung mga partikular na kailangan nila. Sabi ko naman, sayang naman ang oras natin dito sa mga hearing na iyon na wala naman tayong pagdedebatehan kung ano yung magiging lawak ng emergency powers, yun naman ang dahilan kung bakit may hearing tayo. Ang kailangan nila talaga ay umupo at pag-isipan kung ano yung isu-sumite nila.

Pero siguro Connie, ang isa pa kasi namin nais buuin ay magkaroon rin ng isang hearing kasama ang mga mayor dito sa NCR at ibang mga lugar pa. Siyempre dahil marami iyan, may mga iba na baka hindi makarating, sayang din ang pagdinig. Kailangang nandoon sila lahat o ang isang vice mayor man nila or representative para hindi na sabihin ay bakit hindi ninyo kami pinupuntahan? Eh ang problema ay ganito ganiyan. Kaya yung mga tinatawag nating tao dito sa mga pagdinig na ito, napakarami talaga ng mga grupo, lahat sila ay busy rin sa kanilang trabaho, kay kino-coordinate namin ang schedule para walang excuse at sila ay dapat makarating.

Si Sec.Tugade naman, noong umpisa sabi ko, "Secretary there may be some hearings that we don't require your presence", but going forward, nakita naman natin na noong nakaraang hearing, pag wala doon ang mismong kalihim, wala silang pwedeng maging kongkretong kasagutan na mayroon talagang otoridad. Kaya kailangan din talagang kasama si Sec. Tugade sa mga susunod na pagdinig.

Sison: Ma'am, balikan ko lang po yung naging hearing sa mga bus terminals, o yung mga bus po? Papaano ho ang magiging takbo na after nung hearing po natin, mayroon na po bang mas malinaw na plano?

Poe: Yun nga ang iniintay natin. Unang-una, kailangan pa nilang bumili ng lupain diyan sa may north na magiging intermodal. Pag sinabing intermodal, Connie, para sa kaalaman ng ating mga kababayan. Dapat ang binababaan ninyong mga terminal ng bus sa labas ng Metro Manila, dapat meron ng koneksyon diyan para sa train, meron na dapat para sa jeep, meron na rin dapat para sa metro buses. Ang problema kasi Connie diba pag galing sa probinsya, marami tayong mga biyaherong magsasaka o mga magtitinda. Yung mga dala-dala nilang basket o kaing-kaing, pag bumaba sila ng bus diyan sa South West Terminal diyan sa may Paranaque galing sa mga Cavite and Laguna hindi nila pwedeng isakay yan sa mga metro buses so ang nangyayari, sila ay kailangan pang umupa ng private na sasakyan, taxi o ano pa man para dalhin yan. Mas nagiging mahal para sa kanila, mas nagiging mahal para sa mga bumibili. Kaya kung meron ng mga ibang mapapaglipatan, halimbawa jeep o kung anumang mga ibang sasakyan, mas magiging maayos hindi lamang para sa iilan na mga biyahero kundi para doon sa mga nagtitinda rin sa iba't-ibang lugar. Lahat yan hindi pwedeng sabihin magtatayo lang kami ng isang bus terminal. O may bus terminal nga, ano naman ang koneksyon ng mga tao na kailangan ng bumiyahe papuntang Metro Manila. Kulang ang mga sasakyan kaya nga hindi pwedeng tingi-tingi ang kanilang pagbigay ng plano. Kailangan maayos at kailangan may deadline dahil ayaw natin na sabihin, magpapagawa kami ng napakandang train pero kailan matatapos yan? Ang tagal na rin nating naghihintay para kung hindi matapos ng ganung takdang panahon, masisingil natin sila talaga.

Sison: Parang it seems kasi ma'am sinasabi nga ng ilan na parang ang pagbibigay lamang ng emergency powers daw ang makapagpapaayos at makakapag pabilis lahat nung mga kinakailangan para maayos itong problema natin sa trapiko. What is your reaction on this ma'am?

Poe: Makakatulong yan sa ibang paraan. Halimbawa Connie, kailangan bumili ng lupa ng gobyerno kaya kailangan sabihin dun sa may ari alisin ninyo ang mga utilities at poste ninyo diyan kasi sasagasaan yan ng riles o kung ano man. Hindi sila pwedeng masyadong umangal dahil nga may emergency powers tapos sa pagdating sa pagbili ng mga kagamitan o mga kailangan, mas mabilis ang procurement process dahil ang ibang mga requirements ng COA pwede ng ipagpaliban muna. Pero hindi naman nating pwedeng sabihin na o ito ibibigay namin sa inyo absolute power kahit anong gawin ninyo. Kailangan malaman natin emergency powers para saan? Para palawakin ang kalsada? Magkaroon ng mas maraming train? Ano ba ang mas magiging kasama dito?

Sison: So mukhang matatagalan pa ho. Meron na ba tayong naka schedule na susunod na hearing ma'am?

Poe: Siguro within two weeks. Yun kasi ang hinihingi nila pero in the meantime, tuloy-tuloy yung mga meeting natin sa ibang grupo pero gusto kong sabihin sa ating mga kababayan, ang Senado pa lang talaga ngayon ang nagtatrabaho ukol dito sa emergency hearing sapagka't hinihintay pa rin natin ang Kongreso na kumilos, isa yun at alam naman nating hindi papasa ang emergency powers na yan kahit na pumasa na sa Senado kung wala pa rin ang aming counterpart sa Kongreso. Pangalawa, kami nung sinabihan na kailangan ng emergency powers agaran kaming tumawag ng hearing at sinabi ko kami ay bukas diyan dahil galit na tayo lahat sa traffic. Ang problema yung mismong mag-iimplementa ng emergency powers, yung DOTr wala pang plano kung papano nga nila sosolusyunan ang traffic. So parang humihingi sila ng isang kapangyarihan na hindi pa nila alam kung saan gagamitin. Yun ang malabo doon.

Sison: Kami ho ay siyempre susubukan din namin na kunin ang kanila ring pahayag at makikibalita po kami sa inyo muli Senator Grace Poe ukol pa rin po dito.

Poe: Okay thanks Connie.

News Latest News Feed